1 . ئاياللارنىڭ كۈچى چىدامچانلىقتا ئىپادىلىنىدۇ .

         ئاياللارنىڭ بەدىنىدىكى خىمىيىلىك تەركىب ئەرلەرنىڭكى بىلەن ئوخشىمايدۇ . ئادەتتە ئاياللارنىڭ بەدىنىدە ماي ماددىسى كۆپ ، مۇسكۇللار ئازراق بولغانلىقتىن ، ئاياللارنىڭ چىدامچانلىقى ئەرلەرنىڭكىدىن كۈچلۈك بولىدۇ . مەسىلەن ، يېشى ، سالامەتلىكى ئوخشاش بولغان ئەر - ئايال ئۇزۇنغا يۈگۈرگۈچىنىڭ ئىچىدە ئايال گەرچە ئەردەك تېز يۈگۈرەلمىسىمۇ ، لېكىن ئەرلەرگە قارىغاندا ئۇزاقراق يۈگۈرەلەيدۇ . بۇنىڭ سەۋەبى ئادەم يۈگۈرۈش جەريانىدا بەدىنىدىكى گلىكوگېن ماددىسى تەمىنلىگەن " يېقىلغۇ " غا ئايلىنىدۇ .

          لېكىن ، گلىكوگېن ماددىسى تەمىنلىگەن " يېقىلغۇ " چەكلىك بولغاچقا ، بەدەندىكى ماينىڭ داۋاملىق " يېقىلغۇ " بولۇپ بېرىشىگە توغرا كېلىدۇ . كالىفورنىيە ئۇنىۋېرسىتېتى قارىمىقىدىكى دەپۈس مەكتىۋىدە ئېلىپ بېرىلغان بىر قاتار تەكشۈرۈشلەردىن ئىسپاتلىنىشىچە ، ئاياللارنىڭ تېنىدە 25 پىرسەنت ماي ماددىسى ، ئەرلەرنىڭ تېنىدە 15 پىرسەنت ماي ماددىسى بولىدىكەن . شۇڭا ، گلىكوگېن ماددىسى تەمىنلىگەن " يېقىلغۇ " ئىشلىتىپ بولغاندىن كېيىن ، ئاياللار ئۇزۇن ۋاقىتقىچە بەدىنىدىكى ماي ماددىسى تەمىنلىگەن " يېقىلغۇ " دىن ئۈنۈملۈك پايدىلىنىپ تولۇپ - تاشقان جىسمانىي ، مەنىۋىي كۈچىنى ساقلاپ قالالايدىكەن .

          بىراق ، ئەرلەر بولسا ئاسانلا ھېرىپ قالىدىكەن . ئامېرىكىلىق بىر جۈپ ياش ئەر - ئايال بولۇپ ، ئېرى دائىم : " ئايالىم بەك ئاجىز ، شامال چىقسىمۇ ئۇچۇپ كەتكىلى تاس قالىدۇ ، ھەتتا مۇراببا قۇتىسىنىڭ ئاغزىنىمۇ ئاچالمايدۇ ، بازاردىن نەرسە - كېرەك سېتىۋالغاندا ، مەن بولمىسام نەرسىلەرنى ماشىنىغىمۇ سالالمايدۇ ........ " دەيدىكەن . بىر يەكشەنبە كۈنى ئۇلار شەھەر سىرتىغا چىقىپ مۇز تېيىلىپ ئوينىغان . ئۆيگە قايتىپ كەلگەندىن كېيىن ئېرى ھېرىپ ھالىدىن كەتكەن ، كرېسلوغا ئۆزىنى تاشلىغىنىچە ئولتۇرۇپ قالغان . لېكىن ، ئايالى بولسا كەچلىك تاماقنى ئېتىپ ، تاتلىق تۈرۈملەرنى پىشۇرۇپ ئارام ئالماي ئىشلەپ كەتكەن . ئېرى تاماقنى يەپ بولۇپلا ئۇخلاپ قالغان . لېكىن ئايالى پوپايكا توقىغاچ تېلىۋىزور كۆرۈپ ئولتۇرغان . ئازراقمۇ ھارغىنلىق ھېس قىلمىغان . ئېرى بۇنىڭدىن ئەجەپلىنىپ ، ئايالىم ئادەتتە يالغاندىن ئاجىز قىياپەتكە كىرىۋېلىپ مېنى ئىشقا سالىدىغان ئوخشايدۇ ، دەپ ئويلاپ قالغان .

          ئەمىلىيەتتە ئۇ ئاياللارنىڭ يوشۇرۇن كۈچىنىڭ باشقىچە شەكىلدە ئىپادىلىنىدىغانلىقىنى چۈشەنمىگەن .

         2 . ئاياللار بىۋاستە سىزىمغا تايىنىپ شەيئىلەرنى كۈزىتىشكە ماھىر بولىدۇ .

         ئادەتتە سول مېڭىسى تىل ئىقتىدارىنى ، ئوڭ مېڭىسى كۆرۈش سەزگۈ قابىلىيىتىنى تىزگىنلەيدۇ . قىزلارنىڭ سول مېڭىسى ئوغۇللارنىڭكىگە قارىغاندا تېز تەرەققى قىلىدۇ ، ئوغۇللارنىڭ ئوڭ مېڭىسى قىزلارنىڭكىدىن بالدۇر يېتىلىدۇ . شۇڭا ، قىزلارنىڭ سۆز ، يېزىقچىلىق قابىلىيىتى ئوغۇللارنىڭكىدىن يۇقۇرى بولىدۇ .

         ياش قۇرامىغا يەتكەن ئەر - ئاياللارنىڭ مېڭە ئىقتىدارىنىڭ پەرقىمۇ ئىنتايىن چوڭ بولىدۇ . ئەرلەر كىتاب ئوقۇغاندا ئاساسەن سول مېڭىسىنى ئىشلىتىدۇ . خەرىتە ئارقىلىق بىرەر جاينى ئىزدىگەندە ئوڭ مېڭىسىنى ئىشلىتىدۇ . لېكىن ، ئاياللارنىڭ چوڭ مېڭىسى ئىشنى بۇنداق بۆلۈۋالمايدۇ . كۆرۈش سەزگۈسى قابىلىيىتىنى تىزگىنلەيدىغان ئوڭ مېڭىسى تىل قابىلىيىتىنىمۇ تىزگىنلەيدۇ .

         تىل قابىلىيىتىنى تىزگىنلەيدىغان سول مېڭىسى كۆرۈش سەزگۈسىنىمۇ تىزگىنلەيدۇ . شۇڭا ، ئاياللار بىرلا ۋاقىتتا چوڭ مېڭىنىڭ ئىككى بۆلىكىدىن تەڭ پايدىلىنىپ ئىشلارنى بىر تەرەپ قىلالايدۇ . بۇ بىر خىل بىۋاستە سەزگۈنىڭ ياردىمىگە تايىنىپ پىكىر قىلىش ئىقتىدارىدۇر . شۇڭا ، ئاياللار باشقىلار بىلەن سۆزلەشكەندە قارشى تەرەپنىڭ سۆزىنى زېھىن قويۇپ بىلەن ئاڭلاش بىلەن بىرگە ، سۆزلىگۈچىنىڭ ھېسسىياتى ، كىيىنىشى ، ھەرىكىتى قاتارلىقلارنى كۈزىتىپ تۇرىدۇ . باشقىلار بىلەن سۆزلەشكەندە سۆزلىگۈچىنىڭ ئويلىغىنى بىلەن ئوخشاش ياكى ئوخشاش ئەمەسلىكىنى بىلىۋېلىشتا ئاياللار ئۈستۈنلۈكنى ئىگىلەيدۇ .

         3 . ئاياللار ئۆزىنىڭ ئائىلىدىكى ۋە ئىجتىمائىي تۇرمۇشتىكى ئورنىغا بەك ئەھمىيەت بېرىدۇ .

         ئاياللار ئېرى بىلەن جاپادىمۇ ھالاۋەتتىمۇ بىرگە بولۇشنى ئويلايدۇ . ئەر - ئاياللار ھېسسىياتىغا بەك ئەھمىيەت بېرىدۇ . بىراق ، نۇرغۇنلىغان ئەرلەر ئايالى بىلەن بولغان ھېسسىيات ئالماشتۇرۇشقا سەل قارايدۇ .

         ئاياللارنىڭ تەلەپ قىلىدىغىنى ------ ئۇلارغا بولغان ھۆرمەت ، كۆيۈنۈش ، ئىللىقلىق ، مۇھەببەتتۇر !

         مەنبە : " ئاياللار بىلىۋېلىشقا تېگىشلىك ئىشلار " ناملىق كىتابتىن ئېلىندى .

بىـــكەت ئۇقتۇرۇشـــــى

بىــــكەت تەۋسىـــــيەلىـــــرى