پىسخىك ساغلاملىقى ھەققىدە قىسقىچە چۈشەندۈرۈش

             ساغلاملىق تۆت قاتلاملىق مەنىدىن تەركىپ تاپقان .

                بىرىنچىسى تەندە كېسەل بولماسلىق ، يەنى ئەنئەنىۋى مەنىدىكى ساغلاملىق .

                ئىككىنچىسى ، سۇبىكتىپ ئارامسىزلىنىش بولماسلىق ، يەنى پىسخىك ساغلاملىق بولۇپ ، ئۆز ھېسسىياتىنىڭ ياخشى بولۇشى ، ناچار كەيپىيات ۋە ھەرىكەتلەرنىڭ روشەن كۆرۈلمەسلىكىنى كۆرسىتىدۇ .

                ئۈچىنچىسى ، جەمىيەتكە ماسلىشىشى ياخشى بولۇش ، يەنى نورمال خىزمەت ۋە ئۆگىنىشنىڭ ھۆددىسىدىن ھىقالايدىغان ، تۈرلۈك ۋەزىپە ۋە مەجبۇرىيەتلەرنى ئادا قىلىشتىن ھارغىنلىق ھېس قىلمايدىغان بولۇش ، باشقىلار بىلەن چىقىشىپ ئۆتەلەيدىغان ، كۈندىلىك تۇرمۇشتا باشقىلارغا زىيان سالمىغان ئاساستا ئۆزىنىڭ ھەرخىل ئېھتىياجلىرىنى قاندۇرالايدىغان ، ئەتراپىدىكى ئىجتىمائىي مۇھىت بىلەن بىرلىشىپ كېتەلەيدىغان بولۇش .

                تۆتىنچىسى ، ئەخلاقى ياخشى بولۇش ، توغرا ئەخلاق قارىشى ، مۇۋاپىق ئەخلاقى تۇيغۇ ۋە ھەرىكەت بولۇشى ، ئەخلاق مىزانلىرىغا ئاڭلىق رىئايە قىلىپ ، ، باشقىلارنىڭ مۇئەييەنلەشتۈرۈشى ۋە مەدھىيلىشىگە سازاۋەر بولۇشتىن ئىبارەت .

 

                پىسخىك ساغلاملىقتىن ئىبارەت بۇ سۆزنى تۆۋەندىكىدەك ئۈچ تەرەپتىن چۈشىنىشكە بولىدۇ :

                1. پىسخىك كېسەللىك بولماسلىق .

                پىسخىك كېسەللىك يەنە روھىي كېسەللىكمۇ دىيىلىدۇ . ئۇ پىسخىك پائالىيەتنىڭ نورمال بولمىغان ئىپادىسىدۇر . پىسخىك كېسەللىك بولماسلىق پىسخىك ساغلاملىقنىڭ ئاساسلىق تەلىپى بولۇپ ھېساپلىنىدۇ . چۈنكى پىسخىك كېسەللىك ھالىتىدە ، ئادەم پىسخىك پائالىيەت فۇنكىسىيىسىنى نورمال جارى قىلدۇرۇشقا ئامالسىز قالىدۇ . بۇنىڭ بىلەن تۇرمۇش ۋە خىزمەتكە ئېغىر تەسىر يېتىدۇ . پىسخىك كېسەللىك شۈبھىسىزكى ، پىسخىك جەھەتتە ساغلام بولمىغانلىقنىڭ ئىپادىسى .


                2. ناچار پىسخىك پائالىيەتلەرنى ئۆز ۋاقتىدا ئۈنۈملۈك تەڭشىيەلەيدىغان بولۇش .

                كىشىلىك تۇرمۇش ناھايىتى مۇرەككەپ بولۇپ ، قاتمۇ - قات زىددىيەت ، بېسىملارغا تولغان ، ھەممە ئىشلىرى كۆڭۈلدىكلىدەك بولۇپ كېتىدىغان ، دائىملا خوشال - خورام يۈرىدىغان ئادەم بولمايدۇ . خىلمۇ خىل تۇرمۇش مۇھىتىدا پاسسىپ پىسخىكىنىڭ پەيدا بولۇپ قېىسشىدىن ساقلانماق تەس . پىسخىكىسى ساغلام بولغان كىشىلەر مەڭگۈ ياخشى پىسخىك ھالەتنى ساقلىيالىشى ناتايىن . ئۇلارمۇ خاپا بولىدۇ ، ئازابلىنىدۇ ، ئۇنداق ياكى مۇنداق پىسخىك مەسىلىلەرگە دۇچ كېلىدۇ . ئەمما پىسخىكىسى ساغلام بولغان كىشىلەر بۇنداق مەسىلىلەرەە يولۇققاندا ، ۋاقتىدا بايقاپ مۇۋاپىق چارە - تەدبىرلەرنى قوللىنالايدۇ ھەمدە بۇ ئارقىلىق پىسخىك پائالىيەتلىرىنى تەڭشەپ ، ناھايىتى تېزلا نورمال پىسخىك پائالىيەت ھالىتىگە قايتالايدۇ . رىقابەتكە تولغان ھازىرقى جەمىيەتتە ، پىسخىك ھالەتنى ياىشى تەڭشەپ تۇرۇش بولسا ، پىسخىك جەھەتتە ساغلام تۇرۇشنىڭ مۇھىم تەلىپىدۇر .

                3. ئاكتىپ ، مۇقىم بولغان پىسخىك ھالەتنى ساقلاش ، پىسىىك پائالىيەت فۇنكىسىيىسىنى نورمال جارى قىلدۇرۇپ ، ئىجتىمائىي تۇرمۇش داۋامىدا ، يۇشۇرۇن قابىلىيەلىرىنى تولۇق ئىشقا سېلىش .

                بۇ پىسخىك ساغلاملىقنىڭ كۆڭۈلدىكىدەك ھالىتى بولۇپ ، غەلىبە قىلىش ياكى مەغلۇپ بولۇش ، جەمىيەتتە قانداق ئورۇندا تۇرۇشىدىن قەتئىينەزەر ، تۈرلۈك ئىجتىمائىي شارائىتلار ئاستىدا ، نورمال ، مۇقىم بولغان پىسخىك ھالەتنى ساقلاشنى ئۆز ئىچىگە ئالىدۇ .


               پىسخىك جەھەتتە ساغلام كىشىلەر ھەر قانداق ئەھۋال ئاستىدا ، رېئاللىققا ئىمكانقەدەر رازىمەنلىك پوزىتسىيىسى تۇتىدۇ ، ئۇلاردا پىسخىك جەھەتتە تېڭىرقاش ئاز بولىدۇ . ئۇنىڭدىن باشقا بۇنداق كۆڭۈلدىكىدەك ھالەت يەنە خىزمەت ۋە ئۆگىنىشنىڭ ھۆددىسىدىن چىقالايدىغان بولۇش ، ئۆزىنىڭ تىرىشچانلىقى ئارقىلىق ، مۇئەييەن ئۇتۇققا ۋە جەمىيەتنىڭ ئېتىراپ قىلىشىغا ئېرىشەلەيدىغان بولۇش ، ئەتراپىدىكى ھەرخىل كىشىلەر بىلەن ئىناق بولغان كىشىلىك مۇناسىۋەتنى ساقلاپ ، مەسئۇلىيەتنى ئۈستىگە ئالالايدىغان ، دۈچ كەلگەن تۈرلۈك ئىجتىمائىي مەسىلىلەرنى ماھىرلىق بىلەن ھەل قىلالايدىغان بولۇش قاتارلىقلارنى ئۆز ئىچىگە ئالىدۇ . 


ئالدىنقى ماقالىمىزدا تېلىفون بېرىش ھەم ئادەم خاراكتىرى تېمىسىدا تەپسىلى توختالدۇق . ياكى قانداق كىشىلەر پىسخىك جەھەتتە ساغلام كىشىلەر ھېسابلىنىدۇ ؟ توغرىسىدىكى ماقالىنى ئوقۇپ بېقىشىڭىزنى تەۋسىيە قىلىمىز .