تەن - ساقلىقىڭىزنى ساقلاشنىڭ 12خىل ئۇسۇلى


 1. ئۇيقىڭىز قاچقاندا ئاممىياك كىسلاتاسى تولۇقلاڭ 
ھەمىشەئۇيقىڭىز قىچىپ بىئارام بولسىڭىز، ئاممىياك كىسلاتاسى مول يىمەكلىكلەرنى، مەسىلەن، خاسىڭ مېغىزى، ئۈرۈك مېغىزى بانان قاتارلىقلارنى كۆپرەك يەپ بېرىڭ. بۇ تۈردىكى يىمەكلىكلەر كەيپىياتتىكى جىددىيلىكنى تۈگىتىپ ئۇيقۇنى ياخشىلايدۇ. ئۇنىڭدىن باشقا، ئاقسىلدا كۆپ مىقداردا ئاممىياك كىسلاتاسى بار بولۇپ، باش ئاغرىش ۋە كۆكرەك سىقىلىش قاتارلىق كېسەللىكلەرگە مەنپەئەت قىلىدۇ. ئادەتتە گۆش تۈرىدىكى يىمەكلىكلەردە ئاقسىل مول بولىدۇ. 
 
 
2. روھىي بېسمىڭىز ئارتىپ كەتكەندە، ۋىتامىن C ۋە ئاقسىل مول بولغان يىمەكلىكلەرنى يەڭ 
روھىي بېسىم ئارتىپ كەتكەندە بەدەندىكى ۋىتامىن C تىز سۈرئەتتە خورايدۇ. بۇنداق چاغدا ئادەم ئوڭايلا چارچاش ھېس قىلىدۇ. ئادەتتە ۋىتامىن C نىڭ سۇدا ئېرىشچانلىقى كۈچلۈك بولغاچقا بەدەندە زاپاس ساقلىنالمايدۇ. شۇڭا ئەڭ ياخشىسى ھەر كۈنى قەرەللىك ھالدا ۋىتامىن C نى تولۇقلاش بىلەن بىرگە ئاقسىل تولۇقلاش روھى جەھەتتىكى بېسىمنى تۈگىتىشتە ناھايىتى ياخشى ئۈنۈم بېرىدۇ. بۆلدۈرگەن، ئاپېلىسىن، بېلىق تۈردىكى يىمەكلىكلەردە ۋىتامىن C بىلەن ئاقسىل مولراق بولىدۇ. 
 
 
3. كۆزىڭىز چارچاپ كەتكەندە ۋىتامىن A ، ۋىتامىن B ئىستېمال قىلىڭ 
ۋىتامىن A كۆرۈش قۇۋۋىتىنىڭ ئاجىزلاپ كېتىشى ۋە بالدۇر قىرىشىنىڭ ئالدىنى ئالىدۇ. سەۋزە تەركىبىدە ۋىتامىن A مول بولىدۇ. ۋىتامىن B2 مول بولغان پۇرچاق تۈردىكى يىمەكلىكلەرمۇ كۆزنىڭ چارچىشىنى تۈگىتىدۇ. يىلان، بېلىق، كالا جىگىرى، تۇخۇم قاتارلىقلاردا يۇقىرىدىكى ئىككى خىل ماددا مول بولۇپ، كۆزنى ئاسراشتا ياخشى ئۈنۈم بېرىدۇ. 
 
 
4. دائىم بېشىڭىز ۋە يۈرىكىڭىز ئاغرىسا، تويۇنمىغان ماي كىسلاتاسى مول بولغان يىمەكلىكلەرنى كۆپرەك ئىستېمال قىلىڭ
تۇيۇنمىغان ماي كىسلاتاسى قاندىكى خولېستېرىننىڭ مىقدارىنى تۆۋەنلىتىپ، ئارتېرىيە قېتىشىشتىن كىلىپ چىقىدىغان شامال دارىشنىڭ ئالدىنى ئالىدۇ. لېكىن، ئىستېمال قىلىنغان تۇيۇنمىغان ماي كىسلاتاسىنىڭ مۇۋاپىق بولۇشىغىمۇ دىققەت قىلىش كېرەك. كۆپ بولۇپ كەتسە ئاسانلا قان ئازلىقنى كەلتۈرۈپ چىقىرىدۇ. قىزىل پۇرچاق ۋە بېلىق تۈرىدىكى يېمەكلىكلەر تەركىبىدىكى تويۇنمىغان ماي كېسلاتاسى كۈندىلىك ئېھتىياجىڭىزنى قاندۇرالايدۇ. 
 
 
5. جىگەرنىڭ ئىقتىدارى تۆۋەنلەپ كەتكەندە ئاقسىل، سۇلفات كىسلاتاسى مول بولغان يېمەكلىكلەرنى يەپ بېرىڭ 
ئاقسىل تەركىبىدىكى سۇلفات كىسلاتاسى جىگەر ھۈجەيرىلىرىنىڭ قايا ئۆسۈش ئىقتىدارىنى ئىلگىرى سۈرىدۇ. سەككىز ئاياغ، راك، قۇلۇلە قاتارلىق تەركىبىدە سۇلفات كىسلاتاسى مول بولغان يېمەكلىكلەرنى كۆپرەك ئىستېمال قىلغاندا، جىگەرنىڭ ئىقتىدارىنى ئەسلىگە كەلتۈرۈشتە ياخشى ئۈنۈمگە ئېرىشكىلى بولىدۇ. 
 
 
6. كەم قانلىق كۆرۈلگەندە، تۆمۈر ماددىسى مول بولغان يېمەكلىكلەرنى كۆپرەك يەڭ 
ھازىر ئاياللاردا تۆمۈر ماددىسى كەمچىل بولۇش خاراكتېرلىك كەم قانلىق كېسلى كۆپ كۆرۈلىۋاتىدۇ. ئۇنىڭ ئۈستىگە يېمەك-ئىچمەك ئادىتىنىڭ نورمال بولماسلىقىمۇ يوشۇرۇن خاراكتېرلىك كەم قانلىق كېسىلىگە گىرىپتار بولغۇچىلارنىڭ سانىنى كۆپەيتىۋېتىدۇ. شۇڭا، ئاياللار لامنارىيە (خەيدەي)، كالا جىگىرى، پالەك قاتارلىق يېمەكلىكلەرنى كۆپرەك يەپ، بەدەنگە ئېھتىياجلىق تۆمۈر ماددىسىنى تولۇقلاپ تۇرۇشى لازىم. ئۇنىڭدىن باشقا ۋىتامىن C مول بولغان يېمەكلىكلەرنى كۆپرەك يەپ ئورگانىزىمنىڭ تۆمۈر ماددىسىنى قوبۇل قىلىش ئىقتىدارىنى ئىلگىرى سۈرۈش كېرەك. 
 
 
7. مۈرىڭىز تېلىپ ئاغرىغاندا، پۇت-قولىڭىز مۇزلاپ ئىسسىمىغاندا ۋە باشقا فىزىئۇلوگىيىلىك ئۆزگىرىشلەر كۆرۈلگەندە، ۋىتامىن E نى تولۇقلاپ بېرىڭ 
بەدەنگە ئۇزاق ۋاقىت ۋىتامىن E يىتىشمىگەندە، تەدرىجى قان ئايلىنىشقا تەسىر كۆرستىپ، بالىياتقۇنى زەئىپلەشتۈرىدۇ. مۈرە تېلىپ ئاغرىش، پۇت-قول مۇزلاش قاتارلىق ئەھۋاللارنى كەلتۈرۈپ چىقىرىدۇ. شۇڭا تەركىبىدە ۋىتامىن E مول بولغان ئۈرۈك مېغىزى، كاۋا قاتارلىق يېمەكلىكلەرنى كۆپرەك يىيىش-كىلىماكتېرىيەنى يەڭگىلىتىش ۋە ھۆسىن تۈزەشتە ئالاھىدە ياخشى ئۈنۈمگە ئىگە. 
 
 
8. ئىشتھايىڭىز ياخشى بولمىسا، تەركىبىدە گۇڭگۇرت ماددىسى كۆپرەك بولغان يېمەكلىكلەرنى يەڭ 
سۇڭپىياز ۋە سامساقتا گۈڭگۇرت ماددىسى كۆپرەك بولىدۇ. ئەگەر ئىشتھايىڭىز تۇتۇلۇپ قالسا، سۇڭپىياز ۋە سامساقنى كۆپرەك يەپ بېرىڭ، بۇ ئىشتىھايىڭىزنى ئاچىدۇ. 
 
 
9. تېرىڭىز يىرىكلىشىپ كەتسە، تەركىبىدە ۋىتامىن A ۋە يىلىم ماددىسى مول بولغان يېمەكلىكلەرنى يەڭ 
تېرىنىڭ ئىپىدىرما (سىرتقى) قەۋىتى ياكى ئاسراش قەۋىتىدىكى سۇنىڭ خورىشى بەك تېز بولۇپ كەتسە تېرىنڭ قۇرغاقلىشىپ كېتىشى ۋە يىرىكلىشىپ كېتىشىنى كەلتۈرۈپ چىقىرىدۇ. بۇنداق چاغدا سەۋزە، گۆش، كۆكتات، بېلىق قاتارلىق يېمەكلىكلەرنى كۆپرەك يەپ بەرگەندە تېرە سىلىق، پارقىراق ھالىتىگە قايتىدۇ. 
 
 
10. ئاشقازان، ئۈچەي قاتارلىق ئەزالىرىڭىزنىڭ ئىقتىدارى قالايمىقانلاشسا، تالالىق يېمەكلىكلەرنى كۆپرەك يەڭ 
تالاسى مول يېمەكلىكلەر مەسىلەن: ئالما، پۇرچاق، قاتتىق پوستىلىق مېۋە قاتارلىقلار قەۋزىيەتنىڭ ئالدىنى ئالىدۇ. 
 
 
11. ئاستا خاراكتېرلىق چارچاش كېسىلىگە دۇچار بولسىڭىز، شېكەر، ۋىتامىن B1 مول بولغان يېمەكلىكلەرنى كۆپرەك يەڭ 
ئورگانىزملارغا شېكەر ياكى ۋىتامىن B1 يېتىشمىسە ئادەم ئاسانلا چارچاش ھېس قىلىدۇ. بولۇپمۇ ئۇزۇقلۇقنى تېزگىنلەش ئارقىلىق ئۇرۇقلاۋاتقانلار ئاسانلا قەنت يېتىشمەسلىك تۈپەيلىدىن كېلىپ چىقىدىغان بېشى قىيىش، كۆزى قاراڭغۇلىشىش قاتارلىقلارغا دۇچار بولىدۇ. شۇڭا گۈرۈچ، كۆكتات ئۈندۈرمىسى، قارا بۇغداي بولكىسى قاتارلىق يېمەكلىكلەرنى كۆپرەك يەپ بەرسە بەدەننىڭ ھاياتى كۈچىنى ئاشۇرغىلى بولىدۇ. 
 
 
12. سۆڭەك بوشاپ كېتىش كېسىلىگە دۇچار بولسڭىز، كالتىسىي ۋ يىلىم ماددىسىنى تولۇقلاڭ 
كالتىسىي سۆڭەكنى تۈزگۈچى ئاساسى ئېلېمىنت. يىلىم ماددىسى بولسا كالتىسىي سۆڭەككە يېپىشتۇرىدىغان مۇھىم ماددا. شۇڭا، سۆڭەك بوشاپ كېتىشنىڭ ئالدىنى ئېلىشتا سۆڭەكلىك گۆش، بېلىق تۈرىدىكى يېمەكلىكلەرنى كۆپرەك يەپ بېرىش ناھايىتى مۇھىم. 

ئالدىنقى ماقالىمىزدا ۋىتامىن ئىستىمال قىلغاندا دېققەت قىلىدىغان ئىشلار تېمىسىدا تەپسىلى توختالدۇق . ياكى ۋىتامىن B1 ۋە مىجەز توغرىسىدىكى ماقالىنى ئوقۇپ بېقىشىڭىزنى تەۋسىيە قىلىمىز .