چوقۇق ھەر قانداق ياشتىكى بالىلاردا كۆرۈلىدۇ، ئادەتتە چوقۇق يىرىق يانتۇ چوقۇقىنى كۆرسىتىدۇ، كۆپ ساندىكىلىرى بوۋاقلىق مەزگىلىدىن باشلىنىدۇ

يەنى قورساق بوشلۇقىدىكى بىر بۆلەك ئۈچەي تولۇق يېتىلمىگەن بوشلۇق (يىرىق يانتۇ كانىلى)ئارقىلىق ئۇرۇقدان خالتىسىغا كىرىدۇ. شۇنىڭ بىلەن، يىرىقنىڭ بىر تەرىپىدە تۈگۈنچەك پەيدا بولىدۇ، تۈگۈنچەكنىڭ بەزىلىرى ياڭاقتەك، بەزىلىرى كىچىك بولۇپ، سىلىسا قولغا يۇمشاق ئۇرۇنىدۇ، تۇتسا ئاغرىيدۇ، بەزىلىرى ئۇرۇقدان خالتىسىنىڭ ئاستىغا ساڭگىلايدۇ، بالا تۈز ياتقان ياكى ئۇخلىغاندا تۈگۈنچەك قورساق بوشلۇقىغا كىرىپ كېتىدۇ ياكى بوشراق باسسا قورساق بوشلۇقىغا كىرىپ كېتىدۇ ھەم گىرىچ قىلغان ئاۋاز چىقىدۇ.

ئەگەر ئورنىدىن تۇرسا، يۆتەلسە ياكى يىغلىسا، قورساقنىڭ بېسىمى ئاشقاندا تۈگۈنچەك قايتا پەيدا بولىدۇ. مۇشۇنداق ئالامەتلەرگە ئاساسەن بالىنىڭ چۇقۇق بولغانلىقىغا ھۆكۈم قىلغىلى بولىدۇ. چۇقۇق خالتىسىدىكى ئىنچىكە ئۈچەي، قارىغۇ ئۈچەي، سازاڭسىمان ئۆسۈكچە ياكى چاۋا بولۇشى مۇمكىن.

بالىنىڭ يىرىقى ياكى ئۇرۇقدان خالتىسىدا تۈگۈنچەك پەيدا بولغاندا تۈز ياتسا ۋە باسسىمۇ قورساق بوشلۇقىغا كىرىپ كەتمىسە ھەم بالا توختىماي يىغلىسا، چۇقۇقنىڭ كەپلىشىپ قالغانلىقى بولۇپ، دەرھال دوختۇرخانىغا ئاپىرىپ تەكشۈرۈش ۋە ئوپېراتسىيە قىلدۇرۇش لازىم. ئۇنداق بولمىسا، ئۈچەي ئاشۇ بوشلۇقتا ئۇزاق مۇددەت تۇرغاندىن كېيىن، چۇقۇق ئىچىدىكى ئۈچەيگە قان يېتىشمەي نېكروزلىنىدۇ ھەم ئۈچەي توسۇلغاندەك ئالامەت كۆرۈلىدۇ، قۇسىدۇ، چوڭ تەرەت ئازلايدۇ، ئوپېراتسىيە قىلغاندا ئۈچەينى ئېلىۋېتىش زۆرۈر. ئىششىق تۈگۈنچەكنى قول بىلەن بېسىشقا ھەرگىز بولمايدۇ.

ئەگەر باسسا ئۈچەي يېرىلىپ كەتسە، قورساق پەردىسى ياللۇغى پەيدا بولۇپ، ھاياتقا خەۋپ يەتكۈزىدۇ، ئادەتتىكى ئەھۋال ئاستىدا بۇ خىل كېسەل بالىنىڭ ئۆسۈپ يېتىلىشىگە تەسىر كۆرسەتمەيدۇ، ئاغرىمايدۇ، كەڭرەك لاتا بىلەن كۆتۈرۈپ قويسا بولىدۇ. بالىلاردىكى چوقۇقنى ئىككى ياش ئەتراپىدا ئوپېراتسىيە قىلدۇرغان ياخشى.


ئالدىنقى ماقالىمىزدا بالىلارغا سۇ چېچەك چىقسا تېمىسىدا تەپسىلى توختالدۇق . ياكى بالىلاردىكى ۋىتامىن A كەملىكنىڭ ئالدىنى ئېلىش توغرىسىدىكى ماقالىنى ئوقۇپ بېقىشىڭىزنى تەۋسىيە قىلىمىز .