ھۆل تەمرەتكە بوۋاقلاردا كۆپ كۆرۈلىدىغان تېرە كېسەللىكلىرىنىڭ بىرى بولۇپ، بىر خىل ئاللېرگىيىلىك كېسەللىك ئۇنىڭ قوزغىلىشى ئېرسىيەتلىك رېئاكسىيە بىلەن مۇناسىۋەتلىك دائىم زىققا، يەلتاشما قاتارلىق كېسەللىكلەر بىلەن تەڭ قوزغىلىدۇ

كالا سۈتى، تۇخۇم، راك قاتارلىق غەيرىي ئاقسىلغا زىيادە سەزگۈر بولۇپ، ئانا سۈتى بىلەن باققان بالىغا قارىغاندا سۈت پاراشوكى بېرىپ باققان بالىدا كۆپ كۆرۈلىدۇ. بۇنىڭدىن باشقا، مۇھىتنىڭ تۇيۇقسىز ئۆزگىرىشى، تالالىق كىيىم، يۇڭ رەختتىن تىكىلگەن كىيىم ۋە سوپۇنمۇ تېرىنى غىدىقلاپ ھۆل تەمرەتكىنى پەيدا قىلىدۇ.

ھۆل تەمرەتكە ئاساسەن يۈز، پېشانە، قاش، ماڭلاي، قۇلاق ئەتراپىدا بولىدۇ. ئېغىر بولغاندا پۈتۈن بەدەنگە تارايدۇ، دەسلەپتە قىزىل رەڭلىك سۇلۇق دۆڭچە ئەسۋە پەيدا بولۇپ، ئاخىرىدا قاقاچ بولۇپ چۈشۈپ كېتىدۇ. بالا، تېرىسى قىچىشقانلىقتىن بىئارام بولىدۇ، تېرە تاتىلاش ئارقىلىق زەخىملەنگەندىن كېيىن قانايدۇ–دە، باكتېرىيە بىلەن ئاسان يۇقۇملىنىدۇ. ھۆل تەمرەتكە ساقايغاندىن كېيىن تاتۇق بولمايدۇ. بالىدىكى ھۆل تەمرەتكىنىڭ ئالدىنى ئېلىش ئۈچۈن ئالدى بىلەن بالىدىكى زىيادە سەزگۈرلۈكنىڭ سەۋەبىنى تېپىپ چىقىش كېرەك.

كالا سۈتى رېئاكسىيە بېرىدىغان بالىلارغا كالا سۈتى بەرگەندە سۈتنى ئۇزاق قاينىتىش ياكى سۈتكە پۇرچاق تالقىنى قاتارلىق قوشۇمچە يېمەكلىكلەرنى قوشۇپ بېرىش كېرەك. شۇ ئارقىلىق بوۋاقتىكى ھۆل تەمرەتكىنى يېنىكلەتلىكى بولىدۇ. مەيلى ئانا سۈتى بىلەن باققان بالا ياكى سۈت پاراشوكى بىلەن باققان بالا بولسۇن قوشۇمچە يېمەكلىكلەرنىمۇ ئارىلاشتۇرۇپ بېرىپ، بوۋاقنىڭ يېمەكلىك قۇرۇلمىسىنى ياخشىلاپ، كېسەلگە قارشى تۇرۇش كۈچىنى ئاشۇرۇش كېرەك. بۇنىڭدىن باشقا ھۆل تەمرەتكە بولغان بالىنىڭ بەدىنىنى يۈز سوپۇنى، بەدەن يۇيۇش سۇيۇقلۇقى، قىزىق سۇ بىلەن يۇيماسلىق كېرەك. پەقەت ئىلمان سۇ بىلەن يۇيۇپ، ھۆل تەمرەتكىنىڭ ئاينىپ كېتىشىنىڭ ئالدىنى ئېلىش لازىم. بالىغا كىيىمنى بەك قېلىن كىيدۈرمەسلىك، يۇڭ كىيىملەرنىڭ بەدەنگە تېگىپ غىدىقلىشىنىڭ ئالدىنى ئېلىش زۆرۈر.

پات–پات بالىنىڭ چېچىنى چۈشۈرۈپ، تىرناقلىرىنى ئېلىپ تۇرۇش بىلەن بىرگە ۋىتامىن C، كالىتسىي سۇيۇقلۇقى، خلور فېنىرامىن قاتارلىقلارنى دوختۇرلارنىڭ كۆرسەتمىسى بويىچە بېرىش لازىم. بۇ كېسەللىكنى داۋالاشقا ۋاقىت ئۇزۇن كېتىدۇ، ئاسان قوزغىلىدۇ. كۆپ ساندىكى بوۋاق بىر–ئىككى ياشتا ئاران ساقىيىدۇ. شۇڭا، بوۋاقلارغا بولغان كۈتۈشنى چوقۇم ياخشى قىلىش كېرەك.


ئالدىنقى ماقالىمىزدا بالىنىڭ ئەقلىي ئىقتىدارىنى ئاشۇرۇش ئۇسۇلى تېمىسىدا تەپسىلى توختالدۇق . ياكى بالىلارغا سۇ چېچەك چىقسا توغرىسىدىكى ماقالىنى ئوقۇپ بېقىشىڭىزنى تەۋسىيە قىلىمىز .